Os amantes do windsurf terán unha cita importante na praia de O Castro, situada na parroquia ribeirense de Castiñeiras. Alí celebrarase a Iberian Windsurf Cup entre o 10 e o 12 de xullo, un evento que congregará a deportistas de elite nesta disciplina.
Na presentación do evento participaron o concelleiro de Deportes de Ribeira, Álex Vidal; o presidente do Club de Windsurf Catro Ventos, Juan Parada, e outro directivo, Paulo Bueno; ademais do responsable técnico e creativo do circuíto, Alberto Pérez.
Álex Vidal destacou que "Ribeira é todo un referente no deporte e, como non podía ser doutro xeito, no verán toca potenciar as disciplinas náuticas. A praia de O Castro é un lugar de encontro para os amantes do windsurf, así que para nós é todo un orgullo acoller esta competición que reunirá aos mellores deportistas deste campo".
O prazo de inscrición xa está aberto e espérase alcanzar a participación dunhas trinta persoas neste evento deportivo.
