A localidade de Carnota acolleu este domingo a XXXIII edición da Carreira das Areas, un evento que marcou un fito ao ser a primeira vez que se celebra fóra da tempada estival. A pesar do cambio de datas, a proba mantivo o seu atractivo, convertendo a inmensa Praia de Carnota nun impresionante escenario deportivo.
Os participantes nas distancias de 3km e 10km enfrontáronse a un percorrido especialmente desafiante, marcado pola auga sobre a area, o que engadiu dureza á carreira.
Na proba de 10km, Francisco Pais alzouse coa vitoria, seguido por Eloi Couso e Jaci Vello. Na categoría feminina, Tina Fernández impúxose, con Clara Pazos e Diana Balboa completando o podio.
A carreira de 3km tamén ofreceu momentos de gran deportividade. Nicolás Iglesias foi o primeiro en cruzar a meta, seguido por Luis Miguel Feito e Carlos Fraga. Entre as mulleres, Alejandra Formoso acadou a vitoria, seguida pola súa irmá Eva Formoso e Ana Alvite.
Unha das imaxes máis emotivas da xornada foi a chegada á meta das irmás Formoso Recarey na proba de 3km, protagonizando unha loita polas primeiras posicións femininas que espertou os aplausos do público.
A proba contou coa presenza de Sara Vieites, madriña do Circuíto Correndo pola Costa da Morte, quen completou os 3km.
Destacou tamén a participación de Alianza Uhía, técnica de Cultura do Concello de Carnota, quen completou a súa primeira carreira. Habitualmente vinculada á organización, puido vivir a experiencia como corredora.
A organización agradeceu o labor dos voluntarios, así como a colaboración do Jerreiro, Protección Civil e a Policía Local, fundamentais para garantir a seguridade da proba.
Tras trinta e tres edicións, a Carreira das Areas demostra a súa capacidade para combinar deporte, paisaxe e emoción nun dos espazos naturais máis singulares de Galicia.
