A futura instalación funcionará como un espazo multiusos que albergará un obrador de transformación de alimentos, unha cociña formativa e tamén servirá como escenario para eventos gastronómicos abertos á cidadanía.
O proxecto, presentado polo alcalde José Ramón Romero e o concelleiro Roberto Lojo, xunto co director xeral de Comercio, Gabriel Alén, prevé equipar o espazo anexo ao mercado cunha cociña híbrida versátil.
Esta primeira fase centrarase na dotación do equipamento principal, adaptando o lugar para acoller unha ampla gama de actividades. Entre elas, cursos formativos, procesos de transformación e conserva de alimentos, actividades divulgativas e promocionais, mercadillos de produtos locais distinguidos e eventos de showcooking para exaltar a gastronomía da zona.
Ademais, prevese habilitar unha sala específica para xuntanzas e outras actividades relacionadas.
O custo total do proxecto ascende a 493.811 euros, dos cales o Concello de Boiro recibirá unha subvención de 251.052 euros por parte da Consellería de Emprego, Comercio e Emigración.
