A compañía tamén destinará máis de 400.000 euros a optimizar as liñas eléctricas e mellorar a resposta ante avarías antes de que remate o ano, atendendo ás demandas dos concellos da Guarda, O Rosal, Tui e Tomiño.
Os representantes municipais trasladaron a preocupación polos reiterados cortes de subministro e as súas consecuencias para a veciñanza e o tecido empresarial, reclamando ademais unha comunicación máis áxil sobre as incidencias.
UFD presentou o seu plan de investimentos para o período 2026-2029, que inclúe actuacións inmediatas como o mantemento da vexetación nas liñas de media tensión (275.000 euros) e a instalación de nove novos puntos de telecontrol (133.000 euros).
A nova subestación en Tomiño, cun orzamento de 6,7 millóns de euros, atópase en fase de tramitación e irá acompañada doutras melloras na rede, como novas conexións e intervencións na contorna do Seixo.
A Mancomunidade Intermunicipal do Baixo Miño valora a información pero insiste na necesidade de que os investimentos se executen nos prazos previstos e se traduzan en melloras reais, comprometéndose a manter un seguimento das actuacións.
