O Mercado de Tomiño acolle unha nova edición do Mercado de Outono os días 23 e 24 de outubro. Este evento coincide coa apertura da nova cafetería do mercado o venres 23, reforzando o espazo como punto de encontro e de goce da vida local, ademais de lugar de compra. A programación combinará gastronomía, oficios tradicionais e música, destacando os produtos de tempada e o comercio de proximidade.
A alcaldesa, Sandra González, sinalou que "o mercado forma parte da vida de Tomiño, das compras do día a día e dos encontros coa xente". Engadiu que "apoiar o mercado local é apoiar ás persoas que traballan nel e que manteñen vivo o comercio de proximidade". A apertura da cafetería "suma un novo motivo para achegarse ao mercado e contribúe a que sexa un espazo con máis vida, no que apeteza quedar e atoparse".
A programación arrincará o venres 23 ás 11.00 horas cun obradoiro de cociña de Tania Alves (O Fogón do Mercado) sobre croquetas de cogomelos e pan de cabaza. Pola tarde, Suso Cesteiro impartirá un obradoiro de cestería tradicional (16.00-20.00), que se repetirá o sábado. Ás 18.30 horas, a bióloga Purificación Lorenzo ofrecerá unha charla sobre cogomelos da contorna.
O sábado 24, ás 11.00 horas, Marisa Baquero (floristería do mercado) guiará un obradoiro para crear coroas de outono. A partir das 13.00 horas, a sesión vermú ofrecerá tapas elaboradas con produto local (callos e fideuá de cogomelos a 2,50 euros) e música en directo de La Chata (jazz e soul).
Durante as dúas xornadas (9.00-14.00), os espazos efémeros acollerán cestas artesanais de Suso Cesteiro, produtos de Almacén urbano Gourmet e, o sábado, elaboracións de Alén do Val (Rosal) a base de mirabeis. Estes espazos están tamén dispoñibles para novos produtores e iniciativas.
Todos os obradoiros e a charla son gratuítos e requiren inscrición previa. A programación completa e as inscricións poden consultarse en www.tomino.gal.
