O Diario Oficial de Galicia publicou a resolución que estende por outros cinco anos a posibilidade de que o comercio de Tui abra libremente todos os días do ano, incluídos domingos e festivos, en horario de 10:00 a 22:00 horas. Esta designación, que xa foi concedida inicialmente no ano 2012 e renovada en 2020, valora o importante patrimonio e o carácter cultural da localidade, así como o seu crecente potencial turístico.

A resolución destaca o notable incremento da oferta de aloxamento turístico en Tui dende 2012, especialmente a través de albergues e vivendas de uso turístico. Segundo datos do INE, a localidade rexistrou preto de 650.000 pernoitas en establecementos hoteleiros no último ano computado, o que supón un 8% máis que o ano anterior e duplica a cifra de 2012.

O Camiño Portugués, que atravesa Tui, tamén experimentou un crecemento significativo, pasando de 26.000 compostelas en 2012 a máis de 100.000 en 2025. Isto consolida a vila como o cuarto punto de saída máis importante do Camiño de Santiago, reforzando o seu atractivo para o turismo.