O suceso ocorreu ao redor das 00:20 horas no quilómetro 65 da devandita vía, á altura de Tomiño. Un particular alertou aos servizos de emerxencias tras presenciar a colisión e sinalar a posibilidade de que houbese persoas atrapadas no interior dos coches.

Ata o lugar desprazáronse efectivos do Servizo de Urxencias Sanitarias de Galicia-061, os Bombeiros do Baixo Miño, o GES da Guarda, a Garda Civil e a Agrupación de Voluntarios de Protección Civil de Tomiño. Foi necesaria a intervención dos bombeiros para poder excarcerar a un dos ocupantes dun dos vehículos implicados.

Ademais da persoa que tivo que ser liberada, outras dúas resultaron feridas. En total, tres persoas foron trasladadas ao hospital de referencia para recibir atención médica. Os dous vehículos implicados quedaron totalmente esnaquizados como consecuencia do forte impacto.