A campaña, promovida pola Federación de Comercio da Coruña, a Federación Galega de Comercio e a Xunta de Galicia, en colaboración coas patronais locais, ten como obxectivo principal estimular as vendas nos municipios rurais galegos e achegar os clientes aos comercios de proximidade.
Esta acción forma parte dun programa máis amplo que inclúe 40 campañas en 114 localidades de toda Galicia, con 10 actuacións na provincia da Coruña que abranguen 28 municipios ata o mes de outubro. En total, repartiranse 10.000 euros en premios.
Os clientes que realicen compras nos establecementos retallistas das tres localidades participantes ata o 15 de maio poderán participar no sorteo. Para iso, deberán rexistrar as súas compras directamente na web da localidade correspondente a través de calquera dispositivo electrónico. Os comerciantes tamén poderán rexistrar as operacións de compra, duplicando así as opcións dos seus clientes de gañar.
Entre os participantes nesta campaña sortearanse 1.000 euros, distribuídos en 20 tarxetas prepago de 50 euros, que deberán ser empregadas para volver mercar nos comercios de proximidade das respectivas localidades.
O sorteo realizarase o 18 de maio, e a entrega dos premios aos afortunados terá lugar o martes 26 de maio na Praza do Emigrante da Pobra do Caramiñal.
