A iniciativa, denominada “Rede Galega de Oficios Vivos”, promovida pola Consellería de Cultura, Lingua e Xuventude, ten como obxectivo a transmisión de coñecementos artesanais e a súa posta en valor como oportunidade de emprego. A actividade terá lugar na Aula 10 Usos Múltiples do Centro Cultural, situado na Rúa Campo Atalaia, en horario de mañá e tarde.
A xornada está dirixida a persoas maiores de 55 anos e a mozas e mozos de entre 16 e 35 anos, aínda que tamén se admiten participantes doutras idades. As prazas son limitadas a 16 persoas voluntarias, que traballarán en parellas.
O obradoiro centrarase no traballo artesanal en coiro, guiado polo proxecto JATAFARTA. Os participantes coñecerán o percorrido do proxecto, as técnicas, os materiais e a organización dun encontro especializado neste oficio. Incluirase unha introdución ás ferramentas e unha demostración práctica.
Na parte final, realizarase unha actividade práctica adaptada aos asistentes, onde poderán experimentar directamente cos materiais e empregar as ferramentas fundamentais do traballo en coiro. O obxectivo é favorecer a adquisición de coñecementos a través da experimentación e contribuír á transmisión interxeracional.
A participación é gratuíta, pero as prazas son limitadas. As persoas interesadas poden formalizar a súa inscrición a través da ligazón proporcionada pola organización.
