A Escola de Música e Baile Tradicional do Concello de Outes foi a protagonista dunha destacada participación na Xuntanza de Galegos celebrada en Alcobendas, Madrid. A agrupación, que este ano conmemora o seu trinta aniversario, foi convidada pola Casa de Galicia en Alcobendas para formar parte da vixésimo segunda edición do Encontro de Gaitas e Percusión Tradicional.
Unha delegación composta por 22 músicos da escola de Outes, especializados en gaita, baile e percusión, desprazouse ata a localidade madrileña. Durante a súa estancia, ofreceron diversas actuacións e participaron en desfiles que encheron as rúas de Alcobendas coa vitalidade da música e o baile tradicional galego.
“"Agradecemos á Casa de Galicia de Alcobendas a invitación e o seu labor de difusión da nosa cultura fóra de Galicia, así como por divulgar o intenso e valioso traballo que se fai na Escola de Música e Baile Tradicional, coa implicación e a paixón de alumnos e profesores, para conservar e dar a coñecer o noso patrimonio cultural, a nosa música e o noso baile tradicional."
O rexedor de Outes expresou o seu agradecemento á Casa de Galicia de Alcobendas pola invitación e polo seu compromiso coa difusión da cultura galega. Destacou o importante labor da escola, que actualmente conta con máis dun cento de integrantes e é considerada un auténtico orgullo e referente cultural para o municipio. Tamén agradeceu o apoio da Xunta de Galicia, a través da Dirección Xeral de Emigración, que fixo posible a realización deste evento.
