Esta iniciativa, que se estenderá desde o venres 10 ata o 30 de abril, busca incentivar o consumo nos negocios locais. Para conseguir unha das cadeiras, os clientes deberán presentar cinco tíckets de compra de cinco tendas distintas, sumando un gasto mínimo de 120 euros.

Ademais do agasallo directo, a campaña inclúe a creación de 25 vídeos de moda protagonizados polos establecementos asociados. Estes contidos serán difundidos en pantallas, prensa dixital e redes sociais para dar maior visibilidade ao comercio local.

O domingo 12 de abril, instalarase un posto informativo na Praza do Cantón, onde se ofrecerán detalles da campaña e se repartirán lambetadas aos nenos. Neste mesmo punto, os primeiros clientes poderán recoller as súas cadeiras de praia presentando os tíckets de compra. As tendas participantes identificaranse cun vinilo coa palabra OLA nos seus escaparates, en referencia ao nome da campaña.

A presentación da campaña correu a cargo de Alba Expósito e Maricarmen Parcero, presidenta e secretaria de Noia Histórica, respectivamente, xunto co alcalde de Noia, Francisco Pérez. A iniciativa tamén contará con música ambiental nas rúas peonís do casco histórico, buscando crear un ambiente máis atractivo para os compradores.