A delegada da Xunta na Coruña, Belén do Campo, acompañada polo alcalde, Esteban Ares, visitou hoxe o Concello de Lousame para coñecer o labor que desenvolven as 5 persoas contratadas a xornada completa, ao abeiro do programa Galicia Suma Talento: Rural Activo. Esta iniciativa do Goberno galego busca fomentar o emprego e reforzar a prevención de incendios forestais e a conservación do medio rural.
A representante autonómica destacou que a achega de máis de 84.000 euros permitiu a contratación destes traballadores para realizar actuacións de limpeza de montes, xestión da biomasa, mantemento de espazos naturais e outras tarefas forestais e ambientais. Subliñou que o programa ofrece oportunidades laborais e experiencia profesional a persoas desempregadas, mellorando a súa empregabilidade e reforzando a protección do territorio.
Belén do Campo lembrou que a Xunta resolveu unha nova edición de Galicia Suma Talento: Rural Activo, dotada con 20 millóns de euros. No conxunto da provincia da Coruña, financiouse a contratación de 282 persoas en 82 concellos, cun investimento superior aos 5 millóns de euros. Na comarca do Barbanza, 11 concellos recibiron preto de 800 mil euros para contratar a 45 desempregados.
O programa incorporou novidades este ano, como a figura da persoa coordinadora municipal de prevención de incendios para concellos adheridos ao convenio entre a Xunta e Seaga. Tamén se garantiu o mesmo número de contratacións que na convocatoria anterior para concellos afectados por grandes incendios forestais e adheridos ao convenio. Ademais, as persoas contratadas reciben formación específica en prevención de incendios, uso de maquinaria forestal e seguridade.
