O Coliseo Noela de Noia acolleu un acto organizado pola Deputación da Coruña en colaboración con Anmupesca para conmemorar o Día Internacional da Muller no Sector Marítimo. O presidente provincial, Valentín González Formoso, clausurou o encontro, que tamén serviu para entregar recoñecementos a tres mulleres pola súa traxectoria.
As homenaxeadas foron Dolores Gómez Ordóñez, fundadora de Mulleres Salgadas, recoñecida pola súa capacidade de organización; Amalia González, vicepatroa da Confraría de Camariñas, polo seu liderado forxado no traballo diario; e Mercedes Silva, Totakeki, destacada por achegar a linguaxe actual ao mar e transmitir o orgullo da pesca e o marisqueo ás novas xeracións.
Formoso sinalou que a provincia da Coruña "non se entende sen as lonxas, as conserveiras, as redeiras, as bateas, as mariscadoras… Sen todas esas mulleres que sostiveron unha parte esencial da nosa economía e que recibiron menos recoñecemento do que merecían".
O presidente tamén fixo referencia ao "Mapa das Mulleres da Pesca", elaborado pola Deputación, que revela que máis de 6.000 mulleres traballan na cadea de valor da pesca na provincia (42% do sector), e que no marisqueo e redeiras a presenza feminina supera o 95%.
Amosou a súa preocupación pola "realidade que vive o sector, que non é boa" e fixo súas as reivindicacións da Mesa Interinstitucional do Mar de Noia, presidida polo alcalde Francisco Pérez, defendendo a busca de "solucións conxuntas".
Formoso insistiu na necesidade de estudos científicos rigorosos, protocolos de baleirado de ríos, investimento en saneamento e depuración, e impulsou un programa de "valorización e promoción do Berberecho de Noia".
Criticou que as axudas da Xunta para mariscadoras queden reducidas e pediu ao Goberno central que exima ás mariscadoras de pagar cotas mentres non teñen ingresos, lembrando o coeficiente redutor para a xubilación.
A Deputación apoia anualmente con máis de medio millón de euros ás confrarías e agrupacións de mariscadoras, a través de axudas para persoal, modernización de equipamentos e promoción de produtos.
O alcalde de Noia, Francisco Pérez Caamaño, abriu o acto, agradecendo á Deputación a elección de Noia e reafirmando o compromiso municipal coa rexeneración da ría. A presidenta de Anmupesca, Pilar Otero González, tamén participou cun relatorio.
A xornada incluíu unha mesa redonda moderada pola xornalista Marta Doviro, coa participación de Celia Herbón Dieste (Mulleres Salgadas), Verónica Canosa Carril (Frigoríficos de Camariñas), Iria Caamaño Franco (Universidade da Coruña), Rosa Pardo Campaña (Federación Galega de Redeiras Artesás) e Ángeles Piñeiro Santos (SEO Fisterra-Ría de Muros e Noia), abordando o pasado, presente e futuro do sector.
