A delegada da Xunta na Coruña, Belén do Campo, acompañada polo alcalde do Porto do Son, Luis Oujo, realizou unha visita ao IES Porto do Son para comprobar o avance das obras de mellora que a Consellería de Educación, Ciencia, Universidades e Formación Profesional está a executar no pavillón deportivo do centro cun investimento de 267.000 euros. Esta obra inclúese dentro das grandes obras que está a executar a Xunta para seguir renovando as infraestruturas educativas e ofrecer espazos máis seguros, funcionais, inclusivos e sostibles para toda a comunidade educativa.
O centro, que contará este ano con ao redor de 400 alumnos e participa en programas como Club de Ciencia, Clubs de Lectura ou Plan Proxecta, beneficiarase dunhas instalacións deportivas máis seguras e funcionais.
As obras inclúen a execución dun novo peche perimetral da pista deportiva, cunha altura de 3,75 metros, composto por paneis prefabricados de formigón e chapa microperforada de aluminio, garantindo luz natural e ventilación.
Tamén se mellorará a cuberta con novos canlóns e baixantes, substituiranse as cubertas de fibrocemento dos vestiarios por panel sándwich, e habilitarase un novo almacén de máis de 23 metros cadrados. Ademais, reformarase a instalación eléctrica e dotarase dunha nova protección contra incendios.
A representante do Goberno autonómico destacou tamén outras actuacións do Plan Ben_Estar no Concello do Porto do Son, con melloras nos CEIP do Portosín, DE Sobrado-Nebra, Santa Irene e de Xuño, cun investimento duns 100.000 euros.
Na comarca do Barbanza, ademais desta actuación, a Xunta executa outras catro obras en centros educativos por un importe total de case 1,7 millóns de euros: no CEIP Praia Xardín de Boiro (máis de 1,1 millóns), no CEIP Alfonso D. Rodríguez Castelao de Rianxo (case 110.000 euros), no CEIP O Grupo de Ribeira (case 80.000 euros) e no CEIP de Olveira tamén de Ribeira (case 74.000 euros).
Belén do Campo subliñou o compromiso do Goberno galego coa mellora das infraestruturas educativas para ofrecer espazos máis modernos e seguros.
