As acusacións sosteñen que o mozo actuou seguindo un "plan premeditado" e que "executou" o seu pai cunha machada. A defensa, pola contra, argumenta que o acusado era "inimputable" debido a "minguadas capacidades cognitivas e volitivas", polo que os feitos deberían cualificarse como homicidio, cunha pena máxima de dez anos. Esta tese foi rexeitada tanto polo Ministerio Fiscal como pola acusación particular.

Peritos do Instituto de Medicina Legal de Galicia (Imelga) descartaron que o acusado presente deterioración cognitiva ou sintomatoloxía psicótica. Un médico forense explicou que o mozo non padece ningunha patoloxía que altere o seu xuízo da realidade nin brotes psicóticos, aínda que si sofre "un pensamento obsesivo" e "trastorno de ansiedade" que lle causa "esgotamento psíquico e sensación de incomprensión".

As psicólogas do Imelga e unha psiquiatra que atendeu ao acusado en Urxencias do CHUS coincidiron en que o mozo "está sometido á idea reiterada de que ten un grave problema de saúde", o que podería levalo a actuar dese xeito. Subliñaron que "é consciente do que fai e sabe cando está a actuar ben ou mal", e que "tiña intención de acabar coa vida do seu pai e non houbo opción de defensa", cualificando os feitos como "unha execución".

Durante a súa declaración, o acusado alegou estar "colocadísimo" polas pastillas que tomaba, e relatou unha discusión co seu pai por un móbil. Afirmou que foi a vítima quen lle lanzou un coitelo primeiro, provocándolle unha ferida na cara. Negou consumir drogas e asegurou estar "arrepentido", aínda que dixo non lembrar ben os feitos por estar "colocadísimo".

Segundo o escrito de cualificación do Ministerio Fiscal, os feitos ocorreron entre a noite do 21 e o 22 de abril de 2023, cando o acusado, na cociña da vivenda familiar en Muros, agrediu o seu pai cunha machada, propinándolle golpes na cabeza que lle causaron a morte. A Fiscalía e a acusación particular sosteñen que o ataque foi "súbito e inesperado", cando o pai se atopaba "confiado" e "sen posibilidade de recibir axuda".