A programación cinematográfica de Muros incorpórase cunha das grandes estreas do cinema español deste ano. La bola negra, dirixida por Javier Calvo e Javier Ambrossi, poderá verse na localidade desde o mesmo día da súa chegada ás salas de cine de todo o país, o venres 25 de setembro.
O filme chega avalado por unha extraordinaria acollida internacional tras obter o premio á Mellor Dirección no Festival de Cannes. Ademais, foi seleccionada pola Academia de Cine para representar a España na carreira cara ao Oscar á Mellor Película Internacional na edición de 2027.
Inspirada nunha obra inacabada de Federico García Lorca, La bola negra constrúe un relato que conecta as vidas de tres homes pertencentes a épocas diferentes a través de cuestións como o amor, o desexo, a identidade, a memoria e a liberdade. O reparto está encabezado por Guitarricadelafuente, Miguel Bernardeau, Carlos González, Milo Quifes e Lola Dueñas, coas colaboracións especiais de Penélope Cruz e Glenn Close.
A concelleira de Cultura, Caridad González, destacou a satisfacción de poder ofrecer en Muros a estrea dunha das películas españolas máis importantes do ano, permitindo que o público poida desfrutala desde o primeiro día. Subliñou tamén que o Auditorio se consolida como un espazo de referencia para o cinema, achegando á veciñanza títulos de máxima actualidade e relevancia cultural.
As proxeccións de La bola negra terán lugar o venres 25 de setembro ás 20:30 h; o sábado 26 de setembro ás 17:30 h e 20:30 h; e o domingo 27 de setembro ás 17:00 h. As entradas xa están dispoñibles a través da billeteira electrónica do Concello de Muros e nas oficinas do Centro Cultural e Xuvenil.
