O xurado destacou a alta calidade das imaxes presentadas e a variedade de recunchos e momentos que os concursantes capturaron coas súas cámaras.
Os resultados foron os seguintes: o primeiro premio foi para “O Xigante da Insuela”, de José Miguel Barrantes Martín; o segundo premio para “Maxia”, de Patricia Tomé Rocha; e o terceiro premio para “Buscando a Crus do Santo”, de María Denis Rodríguez Busto.
Ademais das tres obras premiadas, seleccionáronse 12 fotografías finalistas que o Concello empregará para a elaboración do Calendario Municipal de Carnota 2027, co fin de seguir difundindo a beleza e o patrimonio do municipio durante todo o ano.
Desde o Concello de Carnota agradeceron a participación de todas as persoas concursantes, cuxa implicación contribúe a poñer en valor o territorio e a fomentar a creatividade. A elevada participación e a calidade das obras presentadas consolidan este certame como unha cita destacada para os amantes da fotografía e da promoción do patrimonio local.
