O encontro, moderado polo Sergas, ACIS e GALARIA EPSS, reuniu os socios do consorcio europeo para presentar as necesidades dos sistemas sanitarios participantes e as oportunidades de innovación na cadea de subministración sanitaria. As empresas e entidades interesadas poderán presentar as súas achegas a través da Consulta Preliminar ao Mercado, aberta ata o 16 de novembro.
A sesión, celebrada hoxe, foi moderada por José María Romero, director da Área de Desenvolvemento e Innovación Sanitaria de ACIS, quen presentou os obxectivos do proxecto REHEAL e explicou as características da contratación pública precomercial (CPP) como instrumento para impulsar o desenvolvemento de solucións innovadoras.
Durante a xornada, os socios do consorcio REHEAL expuxeron as súas organizacións, ámbitos de especialización e contribución ao proxecto. As entidades compradoras participantes detallaron os seus sistemas sanitarios, os centros previstos para a validación das solucións e os desafíos na xestión das súas cadeas de subministración.
Juan Francisco Ínsua, subdirector de Recursos Económicos da Área Sanitaria de Lugo, A Mariña e Monforte de Lemos, e Cristina Enjamio, xefa do Servizo de Consultaría de Galaria, EPSS, SA, presentaron o reto actualizado de REHEAL. Este céntrase no desenvolvemento dunha solución dixital integrada para mellorar a trazabilidade dos produtos sanitarios ao longo do seu ciclo de vida e facilitar a toma de decisións. A solución inclúe tres compoñentes: trazabilidade e verificación de produtos, integración de datos; apoio ás decisións de compra con análise de custos e impactos ambientais; e análise da demanda e potencial de implantación de solucións circulares.
O proxecto utilizará o ámbito cirúrxico como caso de uso común, tomando como referencia categorías como instrumental cirúrxico reutilizable, instrumental robótico ou téxtiles cirúrxicos. Tras a presentación, abriuse un espazo de diálogo para resolver dúbidas e recoller achegas sobre a viabilidade técnica do reto.
A Consulta Preliminar ao Mercado de REHEAL busca contrastar a viabilidade técnica do reto, coñecer as capacidades do mercado e recoller información para definir os requisitos da futura licitación. Empresas, centros tecnolóxicos e organizacións interesadas poden consultar a documentación e completar o formulario de participación ata o 16 de novembro de 2026 na web www.rehealhorizon.eu.
REHEAL é un proxecto financiado polo programa Horizonte Europa cun orzamento de 7,36 millóns de euros, dos cales 3,75 millóns se destinan á contratación pública precomercial. O obxectivo é transformar a cadea de subministración sanitaria mediante solucións innovadoras que favorezan a economía circular e a redución de residuos. O consorcio integra sete socios de seis países europeos e cinco entidades compradoras. O SERGAS participa como entidade compradora, co apoio técnico de GALARIA EPSS, e validará solucións no Hospital Universitario Lucus Augusti (HULA). ACIS achega a súa experiencia en innovación sanitaria e contratación pública.
