A programación aborda cuestións como o consumo de alcohol, tabaco e cannabis, as apostas, os videoxogos e as redes sociais, con actividades adaptadas a cada idade. O obxectivo é proporcionar á mocidade coñecementos, criterio e habilidades para tomar decisións de maneira autónoma e segura, traballando tamén a presión do grupo e a resolución de conflitos.
Os obradoiros estarán adaptados ás diferentes etapas educativas. Para 5º e 6º de Primaria, o programa «Prevención de adiccións con e sen substancia. Desconecta» tratará alcohol, tabaco, videoxogos, apostas e redes sociais. O alumnado de 1º e 2º da ESO participará no programa Unplugged, centrado en habilidades para a vida e a influencia do contorno social. En 3º da ESO, as sesións enfocaranse no consumo de cannabis e vapeadores, e en 4º da ESO haberá sesións sobre as adiccións do século XXI, pensamento crítico e habilidades emocionais.
As actividades serán impartidas por profesionais cualificados dos ámbitos socioeducativo e da psicoloxía, cunha metodoloxía dinámica que fomenta a reflexión e a participación. A programación tamén inclúe sesións específicas para as familias, co obxectivo de facilitarlles información e ferramentas para acompañar os seus fillos e fillas na prevención das adiccións, tratando adiccións tecnolóxicas, comportamentais e o uso de substancias.
Os centros educativos interesados poderán presentar as súas solicitudes ata finais de ano, priorizando os grupos xa constituídos. As actividades para familias poderanse realizar ao longo de todo o ano segundo a demanda. O Concello busca preparar a mozos e mozas para que poidan tomar decisións informadas e seguras. Para máis información, os centros e familias poden contactar co Servizo Municipal de Prevención no teléfono 982 297 498.
