O delegado territorial da Xunta en Lugo, Alfonso Villares, mantivo un encontro institucional co alcalde da Pontenova, Darío Campos, para tratar diversos proxectos de interese municipal.
Villares anunciou que a Consellería de Presidencia, Xustiza e Deportes achegará 30.000 euros do Fondo de Compensación Ambiental deste ano para mellorar a eficiencia enerxética da rede de alumeado público nas parroquias de Vilaeimil, San Paio e Vilarxubín.
Estes apoios permitirán avanzar no impulso das infraestruturas e servizos locais. O delegado lembrou achegas anteriores, como os 30.000 euros de 2025 para o alumeado de Vilaboa, Couso, Barreiriñas e Vilarmide, e os 18.000 euros para renovar a fosa séptica de Vilar de Conforto.
Ademais, a Consellería do Medio Rural destina preto de 48.400 euros para acondicionar a rede viaria municipal de Pacios – Labrada.
Esta xuntanza enmárcase na rolda de visitas institucionais do delegado territorial aos concellos lucenses para coñecer as súas necesidades e demandas.
