Segundo o escrito de acusación da Fiscalía, os feitos tiveron lugar nas inmediacións dun establecemento de lecer nocturno, onde a vítima se atopaba en compañía de dúas amigas. Os acusados achegáronse supostamente a elas e comezaron a molestalas, o que motivou a intervención da persoa prexudicada, que lles recriminou a súa actitude.

De acordo coa Fiscalía, os acusados, coñecedores da orientación sexual da vítima, reaccionaron con insultos de carácter homófobo, proferindo expresións vexatorias e ameazas como “querémoste ver morto por maricón” ou “ímosche dar unha malleira”. O afectado limitouse a pedirlles que se relaxasen e continuou a noite coas súas amigas.

Posteriormente, e tras un intervalo aproximado de 30 minutos, os dous homes agredirían fisicamente á vítima á saída do local, propinándolle golpes e puñadas que lle causaron diversas lesións e chegando incluso a facerlle perder o coñecemento. Como consecuencia dos feitos, o mozo sufriu policontusións e un traumatismo cranioencefálico leve, precisando asistencia médica e un período de dez días para a súa recuperación, aínda que sen secuelas permanentes.

A Fiscalía considera que os feitos son constitutivos dun delito cometido con ocasión do exercicio dos dereitos fundamentais, na súa modalidade de lesión da dignidade por motivos discriminatorios, en concurso cun delito contra a integridade moral, así como dun delito leve de lesións. De forma alternativa, o ministerio público tamén expón a cualificación dos feitos como delito contra a integridade moral.

Por todo iso, solicítase para cada acusado unha pena de dous anos de prisión, unha multa de doce meses cunha contía diaria de seis euros e outra de tres meses tamén de seis euros ao día. Ademais, reclámase a súa inhabilitación para o exercicio de profesións educativas, así como medidas de afastamento e prohibición de comunicación coa vítima. A maiores, pídese que indemnicen ao afectado polas lesións sufridas na cantidade de 357,10 euros.