Ambas as entidades denunciaron que xa hai troncos de piñeiros cortados sobre as rochas que albergan os gravados rupestres, localizados nas coordenadas X 609154, Y 4768054. Ademais, subliñan que a intervención se está a realizar con maquinaria pesada e sen as medidas de protección necesarias para estes bens arqueolóxicos.
Piden que se comproben de inmediato os feitos denunciados, que se inspeccione a zona afectada e que se adopten as medidas cautelares necesarias para evitar danos ou destrucións nos bens arqueolóxicos citados. Así mesmo, solicita a paralización inmediata dos traballos forestais na contorna dos elementos patrimoniais afectados mentres non se garanta de forma efectiva a súa protección.
As asociacións lembran que xa en 2020 informaron da existencia destes petróglifos á Dirección Xeral de Patrimonio Cultural, que confirmou a súa autenticidade e lles asignou un código de rexistro oficial. Con todo, lamentan que non fosen incluídos no visor do PBA (Plan Básico Autonómico) nin no de aproveitamento forestal, o que aumenta o risco para a súa conservación ao non constar publicamente a súa existencia.
A denuncia tamén inclúe a preocupación por outros bens arqueolóxicos na zona que poderían verse afectados, como as Medorras de Parada, a Medorra de las Latas e as penas con petróglifos tipo coviñas. Adega e Mariña Patrimonio consideran que todos estes elementos corren un risco inminente de sufrir danos nos próximos días e urxen ás administracións a actuar con carácter de urxencia.
