O espectáculo, que comezará ás 21:00 horas na praza do Reló, é unha homenaxe ás mulleres que foron piares na construción da identidade, comunidade e futuro en Galicia. Laroá centra a súa proposta nas mulleres que sostiveron familias e o país, a través das súas coplas reivindicativas que conservan a memoria colectiva.
O grupo contará con artistas vinculados á música tradicional para interpretar pezas inspiradas nas voces das mulleres que cantaban ás necesidades do traballo cotián, ao amor e á vida, subliñando a importancia do canto tradicional galego.
O ciclo Son Verán da Deputación busca achegar programación cultural de calidade a toda a provincia durante o verán, con propostas alternativas ás municipais. O circuíto inclúe ópera, musical, tradicional, celta e músicas do mundo, con 13 actuacións en 8 comarcas, priorizando concellos de menos de 20.000 habitantes.
Tras o concerto na Guarda, Son Verán continuará en setembro por concellos como Cangas de Morrazo, Marín, As Neves, O Porriño e Redondela, con actuacións de artistas como Roi Casal e Carlos Núñez.
