O número dous do goberno lucense, pertencente ao BNG, sinalou que esta situación busca "crear unha desestabilización en Lugo", o que considera un problema para toda a cidadanía. A posible moción de censura, que implicaría o apoio dunha concelleira non adscrita, xerou un forte rexeitamento por parte do executivo local.
“"Se o PP fai unha moción de censura cunha tránsfuga que entrou por varios falecementos, alá eles."
Desde o goberno municipal, conformado pola coalición entre o Partido Socialista e o BNG, sublíñase a gravidade desta operación. O tenente de alcalde tamén afeou ao presidente da Xunta, Alfonso Rueda, que poida dar o visto e prace a este movemento, especialmente nun contexto de loito no concello e a un ano das eleccións.
A situación en Lugo, segundo Arroxo, difire doutros casos de mocións de censura, xa que implica a unha persoa que, segundo a súa definición, é unha "tránsfuga" ao ir en contra do partido polo que se presentou e dos seus votantes. O goberno local mantense á espera das decisións, continuando coa execución dos proxectos comprometidos coa cidadanía.
“"Tamén teñen que asumir o custo electoral que lles vai traer, isto vai ser gravísimo para eles. Pero bo, van ter que concienciarse do golpe que van recibir en maio do ano que vén nas eleccións municipais, que vai ser moi forte."
