Esta nova dotación situarase en terreos municipais próximos a unha das avenidas principais do polígono, na contorna do Decathlon. A zona xa é empregada habitualmente por transportistas para estacionar os seus camións durante horas ou días, especialmente as fins de semana, debido á amplitude dos seus viais.
A iniciativa do Concello responde a unha vella demanda do sector, xa que a terminal existente no polígono do Ceao quedou pequena. Optarase por un sistema de concesión, cun procedemento aberto e concorrencia pública, establecendo un prazo de trinta días hábiles para a presentación de ofertas.
“"Esta dotación suporá un paso importante na mellora dos servizos e da ordenación do espazo industrial."
A concesión terá unha duración de dez anos sen posibilidade de prórroga. A empresa adxudicataria disporá de 18 meses desde a formalización do contrato para a posta en funcionamento do estacionamento, período no que deberá redactar o proxecto, obter as licenzas e executar a obra. O custo total correrá a cargo da concesionaria, sen investimento municipal, e esta deberá entregar ao Concello un canon mínimo anual de 1.600 euros, mellorable polas empresas licitadoras.
O aparcadoiro deberá operar de forma continuada durante todo o ano, reservando o 20% das prazas para usuarios en tránsito. Será obrigatorio contar con peche perimetral, control de accesos e certificado de seguridade europea. As tarifas máximas fixadas son de 80 euros ao mes para abonados e un euro por hora para usuarios ocasionais, podendo ser melloradas á baixa nas ofertas.
Esta acción municipal xorde ante o incumprimento por parte da Xunta de Galicia dun compromiso adquirido pola conselleira Ethel Vázquez hai anos. Ademais, o goberno local traballa noutros proxectos, como a adecuación dun espazo no polígono do Ceao, xunto á Avenida Benigno Rivera, para un aparcadoiro de turismos con 125 prazas e un investimento de 450.000 euros, pendente da aprobación do orzamento municipal.
