O rexedor de Lugo, Miguel Fernández, asegurou que, independentemente do resultado da moción de censura rexistrada polo Partido Popular, será o candidato do Partido Socialista nos comicios municipais do próximo ano. Segundo as súas declaracións, esta decisión xa está "dada por feita" dentro da formación política.
“"É un tema que non está en debate, non está sobre a mesa, non está en discusión no partido, dáse por feito."
Estas afirmacións foron realizadas durante a inauguración da senda que conecta os parques periurbanos dos ríos Rato e Miño, obras executadas pola Confederación Hidrográfica Miño-Sil. O alcalde mostrouse optimista respecto ao futuro, manifestando que "dentro dun ano imos estar gobernando a cidade de Lugo, os veciños van darnos o seu apoio" e que "non esquecerán a felonía".
En relación á moción de censura, Fernández indicou que, aínda que se está a dar a entender que xa foi aprobada, "aínda non estamos nese escenario". Subliñou que a moción debe ser levada ao pleno, debatida e votada polos concelleiros. Mentres tanto, o goberno local continuará coa súa axenda e traballando nos proxectos previstos, por "responsabilidade e compromiso".
O rexedor tamén afirmou que, no caso de que a moción de censura prospere, o grupo socialista "fará seguimento" dos proxectos "comprometidos e asinados", e que apoiarán e presionarán para que se leven a cabo, por "responsabilidade cos veciños e coa cidade". Destacou que esta actitude de lealdade e compromiso é unha "forma de pensar e un compromiso diferente" ao que se puido ver noutros momentos.
