O alcalde de Lugo, Miguel Fernández, supervisou persoalmente as intervencións de plantación e renovación vexetal levadas a cabo polo Concello en diversos espazos verdes da cidade. Estas accións, que agora se fan plenamente visibles coa chegada da primavera, están a transformar a paisaxe urbana, realzando a beleza de parques, prazas e xardíns.
“"Coidar o ornato público e a biodiversidade dos espazos urbanos tamén é avanzar nun modelo de cidade máis amable e cunha maior calidade de vida."
O rexedor lucense destacou que estas iniciativas forman parte dunha estratexia integral para consolidar Lugo como unha cidade máis sostible, coidada e orientada ás persoas. A campaña, xestionada pola área de Transición Ecolóxica, implicou a plantación de máis de 55.000 exemplares de especies ornamentais, entre plantas de tempada e bulbos florais, distribuídas por todo o municipio.
Entre as especies plantadas, destacan arredor de 16.800 bulbos, principalmente tulipáns, narcisos e xacintos, que nestas semanas acadan o seu máximo esplendor. Esta floración contribúe a que o resultado das actuacións sexa especialmente notable nos espazos públicos da cidade. O investimento total nesta iniciativa superou os 53.900 euros, cubrindo o subministro, transporte e plantación, o que permitiu reforzar significativamente o ornato público nun momento clave do ano como é a primavera.
