As concas de xabarís convértense cada vez máis nunha presenza habitual no centro urbano de Lugo, causando prexuízos aos veciños e danos materiais. Para facer fronte a esta situación, o Concello de Lugo impulsará a creación dunha mesa de traballo que fomente a colaboración entre as distintas administracións implicadas.
Segundo explica Antonio Ameijide, concelleiro de Infraestruturas e Mobilidade, "intentaremos reunirnos en próximas datas coa Deputación, a Confederación Hidrográfica Miño-Sil, a Xunta e o Goberno para traballar e coordinarnos de forma conxunta para atallar este problema". O edil subliña a necesidade de "defender" as zonas verdes da cidade, que sofren "o destrozo de amplias zonas verdes, dende a Avenida de Madrid ata o Parque de Rosalía".
Ameijide tamén sinala os desperfectos materiais ocasionados polos animais, como danos en "regos automáticos, plantas ornamentais e outro tipo de infraestruturas". Insta á Deputación a traballar na solución, xa que é responsable de "amplas bolsas de terreo na cidade que son usadas por estas colonias de xabarís para buscar cobixo". O desbroce e coidado destas parcelas públicas considérase de "vital importancia" para erradicar estas concas do contorno periurbano.
As incursións destes animais, segundo o concelleiro, están provocadas "polo abandono destas bolsas de solo, algunhas delas públicas, onde se acubillan ata a noite". Os seus obxectivos céntranse en fincas próximas ao recinto histórico, así como parques como o de Rosalía e rotondas sen desbrozar.
Como medida para controlar a expansión desta especie, a Xunta xa puxo en marcha a instalación de gaiolas trampa en contornos urbanos, establecendo un protocolo de colaboración cos concellos. Antonio Ameijide confirmou que xa se iniciaron contactos coa Xunta para implementar "unha serie de ferramentas", que inclúen o "trampeo con gaiolas" e o "control cinexético" a través de batidas.
