A iniciativa, programada entre as 18:00 e as 22:00 horas, busca achegar a ciencia á cidadanía mediante propostas de experimentación e aprendizaxe. O evento está integrado na European Researchers' Night, dentro das accións Marie Skłodowska-Curie, e conta coa participación de entidades da rede European Children's Universities Network.
Durante a xornada, os asistentes poderán participar en diversos obradoiros prácticos que abranguen temáticas como o ADN, a saúde animal, os microminerais e a fibra óptica. Ademais, o encontro servirá para dar a coñecer os traballos de investigación que se desenvolven no Instituto de Saúde Global e Desenvolvemento Sostible do campus lucense.
