A alcaldesa de Lugo, Elena Candia, recibiu no Concello ao presidente da Asociación Provincial de Hostalería, Cheché Real, xunto a outros membros da directiva como Juan Agra, Jacobo García, José Luis Fernández e Manuel Fernández. O encontro serviu para a presentación formal da directiva e para tratar diversas cuestións de interese para o sector hostaleiro da cidade.
Unha das principais demandas da Asociación foi a súa participación activa na elaboración da ordenanza de contaminación acústica. A entidade sinalou que non puido coñecer previamente o contido do documento nin trasladar as súas suxestións, polo que urxe que as súas achegas sexan tidas en conta. Tamén manifestaron a súa disposición a colaborar no control de establecementos que xeren problemas de convivencia e amosaron apoio á colocación de cámaras en puntos conflitivos para mellorar a seguridade.
Outro punto clave da conversa foi a necesidade de retomar a ordenanza das terrazas. A Asociación destacou a importancia de revisar e actualizar esta normativa, que regula aspectos fundamentais como materiais, distancias e ocupación do espazo público, co fin de contar cun marco axeitado ás necesidades actuais do sector e da cidade.
Abordouse tamén a situación do servizo de taxi, sinalando a necesidade de máis vehículos dispoñibles. O Concello xa está a traballar na ampliación do número de licenzas para incrementar a oferta. Ademais, tratouse o funcionamento da Zona de Baixas Emisións (ZBE) e as súas implicacións para a hostalaría.
A alcaldesa coincidiu na importancia de manter unha interlocución directa co sector, coñecer as súas necesidades e analizar as cuestións que afectan á súa actividade e á convivencia urbana. Elena Candia agradeceu á Asociación a súa disposición ao diálogo e as achegas realizadas.
