Galicia estrea este domingo, 28 de xuño, o seu novo Parque Central, un gran espazo lúdico e natural situado no centro xeográfico exacto da Comunidade Autónoma. A infraestrutura, creada pola Deputación Provincial de Lugo tras tres anos de obras e xestións, atópase en Nugallás (Amarante), no municipio lucense de Antas de Ulla, un enclave cuxas coordenadas foron acreditadas polo Instituto Geográfico Nacional.
A alcaldesa de Antas de Ulla, Pilar García Porto, destacou que esta infraestrutura "pon en valor un enclave único" e "abre as portas para poder traballar a nivel turístico e de promoción", concibíndose como un "punto de partida importante" para xerar oportunidades e emprego na zona. Subliñou que, aínda que outros municipios tiveron historicamente esa consideración, "as coordenadas están en Antas" e trátase dunha "cuestión de oportunidades e de realidade".
Para Antas de Ulla, que "nunca tivo unha infraestrutura de primeiro nivel como esta", o parque será clave para o desenvolvemento de accións futuras de promoción e desenvolvemento económico vinculadas ao turismo, como rutas de sendeirismo ou actividades para atraer visitantes, grupos profesionais e centros escolares.
O Parque Central de Galicia preséntase como un "espazo de natureza conservado" e modificado para o seu novo uso. Retirouse un eucaliptal e a finca integrada na estrutura inclúe unha zona lúdica, unha área infantil e un "pequeno bosque de frondosas" que reflicte a paisaxe da contorna. A intención é que os usuarios vivan "unha experiencia" e sintan "a esencia de Galicia".
O proxecto tamén busca pór en valor a riqueza da comarca. Nas proximidades atópanse os Petroglifos de Monte Farelo e un valioso patrimonio arquitectónico con pazos e casas grandes. O concello xa programa eventos deportivos e rutas que terán o parque como punto de partida.
A construción requiriu a xestión de fincas por parte da Deputación de Lugo e a superación de "alguna limitación" da Xunta de Galicia, que obrigou a adaptar o proxecto. García Porto mostrouse convencida de que a infraestrutura "vai ter vida" e ofrece unha "oportunidade única".
A xornada de inauguración está pensada como un evento "para vir en familia, veciños, amigos e visitantes". Incluirá un acto oficial, actuacións musicais da asociación cultural Fiadeira, o músico Sergio Alba e o grupo Treixadura, ademais dunha degustación de produtos locais. Para facilitar a asistencia, dispuxéronse autobuses gratuítos.
Aínda que a sinalización física do punto exacto do centro xeográfico aínda non está colocada, a alcaldesa indicou que se pode atopar con axuda de Google. A Deputación prevé colocar un monólito nese punto para a súa localización sinxela.
