O director xeral de Comercio e Consumo, Gabriel Alén, acompañado polo delegado da Xunta en Lugo, Alfonso Villares, participou hoxe na entrega de premios da campaña desenvolvida nos barrios da cidade. Esta foi a última parada dunha iniciativa que se materializou en accións quincenais de promoción do consumo local en distintas localidades galegas, especialmente en municipios sen centros comerciais abertos.
A campaña estivo activa en Lugo ata o pasado 15 de outubro. En total, a iniciativa chegou a máis de medio cento de asociacións de comerciantes en toda Galicia. En cada unha das localidades involucradas, como hoxe en Lugo, entregáronse 20 tarxetas regalo de 50 euros entre a clientela participante.
