O Torreense, un modesto club da Segunda división portuguesa, culminou unha tempada de soño ao alzarse coa Copa de Portugal tras vencer ao Sporting por 1-2 na final disputada este domingo. O gol decisivo chegou na prórroga, transformado de penalti polo caboverdiano Stopira, quen militou anteriormente no Fabril e que agora se medirá a España e Uruguai no vindeiro Mundial.

A vitoria non só outorga ao equipo de Torres Vedras, na área metropolitana de Lisboa, o seu primeiro título copero, senón que tamén lle garante unha inédita participación na Liga Europa. Alí podería enfrontarse a equipos como o Celta.

O partido foi disputado dende o inicio. O Torreense xa creara perigo cun disparo do español Javi Vázquez, ex xogador do CD Lugo na tempada 2023/2024. Foi precisamente Vázquez quen sacou o córner que culminou co primeiro gol do encontro, anotado de cabeza polo maliano Kévin Zohi no minuto 4.

O Sporting logrou empatar no minuto 54 grazas a un erro defensivo que aproveitou o dianteiro colombiano Luis Suárez. Non obstante, a igualada non durou moito. Tras unha falta na prórroga, Maxi Araújo provocou un penalti que Stopira converteu no definitivo 1-2, impedindo que o Sporting revalidase o título.

Ademais da Copa, o Torreense aspira a ascender á primeira división se vence ao Casa Pia na eliminatoria de ascenso o próximo día 28.