O programa, promovido pola Consellería de Política Social, conta con máis de 110 negocios participantes na provincia de Lugo e arredor dun milleiro no conxunto de Galicia. Entre os establecementos adheridos figuran casas rurais, axencias de viaxes, balnearios, ópticas, centros de audición, farmacias, tendas de moda e servizos culturais e de espectáculos.
Toda a información sobre o programa, incluída a listaxe completa de establecementos, está dispoñible na páxina web oficial. Alí tamén se atopa o formulario para que novos negocios se sumen á iniciativa.
O Carné+65 é gratuíto e non require activación. As persoas maiores de 65 anos empadroadas en Galicia reciben o carné automaticamente no seu domicilio. Para aqueles que non o recibisen, poden solicitalo a través do correo electrónico xestion.carne65.maiores@xunta.gal.
O obxectivo desta iniciativa é fomentar un envellecemento activo e saudable, facilitando que as persoas maiores poidan acceder a actividades, produtos e servizos en condicións vantaxosas.
