O voceiro provincial do PP, Antonio Ameijide, criticou o que considera un "respaldo político e económico" do goberno provincial a colectivos veciñais que, segundo el, mostraron apoio ao PSOE e protagonizaron "insultos e coaccións" durante o último pleno municipal. Ameijide afirmou que "Non pretendían defender os intereses dos lucenses, senón a quen os financia".

Os populares sinalan que a institución provincial destinou preto de 800.000 euros entre 2017 e 2026 á Federación de Vecinos de Lugo e á Asociación de Vecinos, Comerciantes e Industriales de A Milagrosa. O PP sostén que estes colectivos recibiron financiamento provincial a cambio de apoio político.

Ademais, o PP acusa o PSOE e o BNG de "castigar" o municipio de Lugo coa retirada de maquinaria do parque móbil provincial. Segundo Ameijide, equipos que traballaban na mellora de firmes e limpeza de cunetas foron trasladados a Monforte e Vilalba pouco antes do cambio de goberno municipal.