A Xunta de Goberno Local do Concello de Lugo aprobou os proxectos de modificación de distintas ordenanzas fiscais municipais. Estas medidas, que inclúen reducións de ata o 80% no Imposto sobre Bens Inmobles (IBI), no Imposto sobre Construcións, Instalacións e Obras (ICIO) e no Imposto sobre Actividades Económicas (IAE), buscan favorecer a implantación e ampliación de actividades económicas que xeren emprego indefinido.
Estas bonificacións forman parte dos pasos necesarios para a incorporación de Lugo á iniciativa galega de Concellos Emprendedores, Doing Business Galicia. As porcentaxes de redución establécense en función dos novos postos de traballo creados: un 50% para entre 1 e 10 empregos, un 75% para entre 11 e 20, e un 80% para 21 ou máis. Os novos contratos deberán ser indefinidos, a xornada completa e destinados a persoas desempregadas inscritas como demandantes de emprego.
No ICIO, a modificación da Ordenanza Fiscal nº 202 incorpora unha bonificación para obras vinculadas á implantación ou ampliación de actividades económicas que cumpran estes requisitos. Os postos de traballo creados deberán manterse durante os tres exercicios posteriores á finalización das obras.
No IBI, a Ordenanza Fiscal nº 203 establece unha bonificación para os inmobles onde se desenvolvan estas actuacións, cunha duración de tres anos, sempre que se acredite o mantemento dos novos postos de traballo.
Pola súa banda, a modificación do IAE inclúe unha bonificación durante tres exercicios para empresas que implanten unha nova actividade ou amplíen instalacións e creen emprego indefinido no municipio, cumprindo os mesmos criterios de contratación.
A proposta de modificación do IBI tamén introduce cambios noutras bonificacións. Mantéñense as bonificacións para familias numerosas (30% categoría xeral, 50% especial) na vivenda habitual. Introduce unha novidade para casos de separación ou divorcio, considerando vivenda habitual de cada proxenitor aquela onde estea empadroado, debendo os fillos estar empadroados na vivenda habitual de calquera deles.
Para inmobles vinculados a actividades agrarias e gandeiras declaradas de interese municipal, mantense a bonificación do 95% durante tres anos, que se aplicará desde o período impositivo seguinte á solicitude. Tamén se concreta a consideración de vivenda habitual e a documentación para a bonificación pola instalación de sistemas de aproveitamento da enerxía solar para autoconsumo.
Respecto ao Imposto sobre Vehículos de Tracción Mecánica (IVTM), a Ordenanza Fiscal nº 200 amplía de tres a cinco anos a duración das bonificacións para vehículos menos contaminantes. Contempla unha redución do 50% para híbridos e do 75% para eléctricos, de emisións nulas ou que empreguen combustibles alternativos. Estas bonificacións requiren solicitude expresa.
Finalmente, a modificación da Ordenanza Fiscal Xeral cambia o criterio de aplicación do importe mínimo de 1.000 euros de débeda principal pendente para a derivación da acción de cobro por sancións de tráfico. Nos supostos nos que o propietario sexa responsable, este límite vincularase ao vehículo.
Os proxectos serán elevados ao Pleno para a súa aprobación inicial. A previsión é que as modificacións entren en vigor o 1 de xaneiro de 2027, unha vez completada a tramitación e publicada a súa aprobación definitiva no Boletín Oficial da Provincia.
