A cidade de Lugo acolle esta semana a undécima edición do Campus de Baloncesto Álex Llorca, que conta co apoio da Xunta de Galicia. Nesta edición participan 111 rapaces e rapazas, con idades comprendidas entre os 8 e os 18 anos. Os asistentes proceden de diversos puntos de Galicia, así como de Castela e León, Cantabria e Madrid.
Durante a semana, os participantes combinarán a práctica deportiva con actividades formativas, de lecer e convivencia. A Delegación Territorial acolleu hoxe unha recepción aos inscritos, que contou coa presenza do delegado territorial, Alfonso Villares; o xogador profesional e impulsor do campus, Álex Llorca; e Rubén Engroba, en representación da organización.
Alfonso Villares destacou a importancia de iniciativas como esta para promover o deporte base e transmitir valores como o esforzo, a superación e o traballo en equipo entre os máis novos. Felicitou aos organizadores por consolidar un campus que xa é un referente do baloncesto formativo.
A Xunta colabora novamente con esta iniciativa, facilitando o aloxamento dos participantes que asisten en réxime interno. Esta contribución axuda ao desenvolvemento dunha actividade que cada verán reúne en Lugo a mozos e mozas de diferentes procedencias arredor da súa paixón polo baloncesto.
O programa inclúe adestramentos técnicos e tácticos, competicións, charlas formativas e actividades de ocio, dirixidos por un equipo de arredor de vinte profesionais entre adestradores, preparadores e persoal de apoio. O obxectivo é mellorar o rendemento deportivo e fomentar o desenvolvemento persoal dos asistentes.
O Campus Álex Llorca chega á súa undécima edición, superando xa os 1.300 participantes dende a súa creación e consolidándose como unha das propostas deportivas de referencia do verán en Galicia.
