O suceso comezou nun control rutineiro de estrada na localidade de Monterroso, cando o condutor, ao que os axentes da Garda Civil deron o alto para identificalo, emprendeu a fuxida coa súa furgoneta. A persecución prolongouse ata a cidade de Lugo, a uns 40 quilómetros do punto de inicio.

Finalmente, dúas patrullas lograron pechar o paso ao fuxitivo no barrio da Piringalla, momento no que o condutor impactou co seu vehículo contra os coches oficiais. O home, sobre o que pesaban dúas requisitorias de busca e captura emitidas por xulgados da provincia de Lugo, deu positivo no control de drogas ao que foi sometido.

Tanto o detido como dous axentes da Garda Civil tiveron que ser trasladados ao hospital para recibir asistencia sanitaria. A Garda Civil de Tráfico e a Policía Xudicial están a instruír dilixencias que serán remitidas ao Xulgado, xunto co arrestado, por diversos delitos.