O delegado territorial, Alfonso Villares, deu a benvida hoxe a unha nova quenda de 23 participantes, de entre 12 e 14 anos, que convivirán durante unha semana nas instalacións. Estes campamentos buscan fomentar a creatividade dixital e promover un uso lóxico e racional da tecnoloxía.
As actividades inclúen a creación e edición de vídeo, deseño 3D, impresión 3D, estampación manual e mecánica, gravación e edición de podcast, creacións no metaverso, realidade virtual, web-app ou smartphones. Ademais, a programación complétase con xogos, deportes, visitas pola cidade e actividades no río.
A programación de campamentos no LUG II comezou en xullo con propostas musicais e continuou con tres dedicadas á tecnoloxía. Finalizará cun campamento sobre emprendemento, previsto do 21 ao 28 de agosto, para menores de 15 a 17 anos.
A campaña Modo Verán Activo da Consellería de Cultura, Lingua e Xuventude suma na provincia de Lugo un total de 2.593 prazas en campamentos, minicampamentos e campos de voluntariado, dirixidos a mozos e mozas de entre 9 e 30 anos.
