A constitución das comisións previas ao pleno confirmou a decisión da alcaldesa, Elena Candia, de ceder a presidencia da Comisión de Urbanismo, Mobilidade, Obras e Zona Rural á concelleira non adscrita María Reigosa. Esta área posúe un peso considerable dentro da estrutura municipal.

O nomeamento saíu adiante coa abstención do PSdeG e BNG, que intensificaron as súas críticas. O voceiro socialista, Miguel Fernández, cualificou o movemento de "profundamente revelador" e sinalou que evidencia "pagos políticos derivados da moción de censura", argumentando que as designacións responden a "equilibrios artificiais" e non a "criterios de capacidade nin de organización institucional".

Fernández acusou o PP lucense de "utilizar os resquicios legais para sortear o espírito da normativa antitransfuguismo", considerando que situar a Reigosa nunha comisión estratéxica supón "unha burla" aos principios democráticos e un "deterioro da calidade institucional". "Non estamos ante unha cuestión menor nin técnica. Estamos ante outra mostra máis dun modelo de goberno sustentado na aritmética da moción de censura e non no interese xeral de Lugo", afirmou.

Pola súa banda, o voceiro do BNG, Alexandre Penas, cualificou a situación de "lamentable" e cuestionou que unha edil non adscrita dirixa unha área con membros do goberno con "anos de experiencia e xestión". Penas suxeriu que a alcaldesa "parece estar secuestrada pola omnipresencia da concelleira tránsfuga".

Elena Candia defendeu a normalidade do proceso, subliñando que todos os órganos quedaron constituídos "legalmente" e "sen ningún voto en contra", e deu por pechado o cambio organizativo tras a constitución das distintas comisións municipais.