A Praza Pío XII, punto de confluencia dos tres Patrimonios da Humanidade de Lugo, foi o escenario escollido pola alcaldesa, Elena Candia, para desvelar o programa completo do Arde Lucus. A edición deste ano promete máis concertos, coas actuacións xa anunciadas de Abraham Cupeiro, Celtica Pipes Rock e Grimorium, ademais dunha sesión de circo ampliada e nocturna.

Este aumento na oferta cultural será posible grazas a un lixeiro incremento do orzamento, asegurou Candia, que tamén destacou a colaboración doutras institucións. A rexedora anunciou ademais a creación dun espazo permanente para o Arde Lucus no MIHL (Museo Interactivo da Historia de Lugo), recoñecendo o valor da festa como patrimonio inmaterial da cidade.

O programa estenderase, como é habitual, de xoves a domingo. Entre as novidades deste ano atópase o adianto do acto final da festa ao mediodía do domingo e un cambio na localización do mercado. A maior parte dos postos situaranse na Praza de Santo Domingo e na Rúa da Raíña, mentres que o espazo infantil manterase na Soidade.

As entradas para o espectáculo estrela, o Circus Máximus, que se celebrará os días 20 e 21 de xuño na explanada do Pazo dos Deportes, xa están á venda dende este venres, 12 de xuño, a partir das 09.00 horas na plataforma www.entradaslugo.es. Este espectáculo de acrobacias e batallas, que recrea a época romana con música e lume, é un dos emblemas da festa dende os seus inicios.