O Concello de Lugo está a estudar a reformulación do trazado do carril bici co obxectivo de corrixir os problemas de mobilidade que está a ocasionar e avanzar cara unha solución que permita compatibilizar o impulso da mobilidade sostible coas necesidades reais dos cidadáns.
O concelleiro de Mobilidade e Obras, Antonio Ameijide, mantivo en Bruxelas varias xuntanzas no Parlamento Europeo para coñecer de primeira man as condicións que regulan as actuacións financiadas con fondos comunitarios, as posibilidades de modificar o proxecto e os prazos para abordar unha eventual reformulación e incluso supresión de certos tramos por seguridade.
Ameijide explicou que o obxectivo é estudar todas as alternativas para mellorar o carril bici e corrixir os problemas na mobilidade diaria, buscando "tomar decisións con todas as garantías e co máximo rigor".
O concelleiro incidiu en que a modificación do trazado non ten que implicar un cambio na natureza nin nos obxectivos fundamentais da actuación, defendendo a necesidade de adaptar o percorrido ás necesidades da cidade sen renunciar á mobilidade sostible.
Durante a visita, analizouse o marco normativo europeo, en concreto o artigo 71 do Regulamento (UE) n.º 1303/2013, sobre a durabilidade das operacións financiadas con fondos europeos, que contempla a posible devolución das achegas cando se produzan modificacións substanciais.
Dende o Concello de Lugo considérase necesario determinar o alcance das posibles modificacións para asegurar que unha reformulación do trazado sexa compatible coas condicións da axuda europea, distinguindo entre un cambio no percorrido e unha alteración substancial da finalidade orixinal.
Ameijide sinalou que se está a analizar "como actuar dentro da legalidade e con todas as garantías" para adaptar o trazado sen cambiar os obxectivos da actuación.
