A alerta laranxa por choiva, activada desde primeiras horas da tarde, prevé unha precipitación acumulada que pode acadar os 30 mm nunha hora, segundo a Axencia Estatal de Meteoroloxía (Aemet).
Ante a situación, a Dirección Xeral de Emerxencias e Interior informou aos concellos afectados, deputacións, servizos de Protección Civil e clubs náuticos. Recoméndase circular con precaución, informarse sobre o estado das estradas e non atravesar zonas inundadas nin aparcar nas ribeiras dos ríos.
A Comisión Escolar de Alertas acordou a suspensión da actividade no exterior dos centros educativos comprendidos nas zonas afectadas, desde as 15,00h de hoxe ata as 00,00 h de mañá. Esta medida afecta a un total de 74 concellos.
Na zona do interior da Coruña, os concellos afectados son: Ames, Aranga, Arzúa, A Baña, Boimorto, Boqueixón, Brión, A Capela, Coirós, Curtis, Frades, Irixoa, Melide, Mesía, Monfero, Negreira, Ordes, Oroso, O Pino, As Pontes de García Rodríguez, Santa Comba, Santiago de Compostela, Santiso, Sobrado, As Somozas, Teo, Toques, Tordoia, Touro, Trazo, Val do Dubra, Vedra e Vilasantar.
O centro de Lugo abrangue os concellos de Abadín, Antas de Ulla, Begonte, Castro de Rei, Castroverde, O Corgo, Cospeito, Friol, Guitiriz, Guntín, Láncara, Lugo, Meira, Monterroso, Muras, Outeiro de Rei, Palas de Rei, Paradela, O Páramo, Pastoriza, Pol, Portomarín, Rábade, Riotorto, Sarria, Vilalba e Xermade.
Así mesmo, a Secretaría Xeral para o Deporte anunciou a suspensión da actividade deportiva do programa Xogade e federada no exterior, agás os deportes náuticos e acuáticos federados, nas zonas con alerta meteorolóxica.
Recoméndase consultar a páxina web do CIAE 112 (www.axega112.gal) para obter información meteorolóxica e ligazóns de interese.
