O conxunto lucense apareceu este venres na listaxe do máximo organismo do fútbol mundial, que inclúe a "todos os clubs que actualmente enfrontan prohibicións de rexistro debido a diversas infraccións, como disputas financeiras ou incumprimentos normativos".

A FIFA, presidida por Gianni Infantino, non especificou o motivo concreto da sanción nin os mercados de fichaxes afectados, limitándose a un xeral "until lifted" (ata novo aviso).

Fontes do propio CD Lugo aclararon posteriormente que o problema real estaría relacionado co pago dos dereitos de formación dun futbolista do seu filial. A entidade quixo transmitir tranquilidade á afección, asegurando que o conflito xa foi resolto tras alcanzar un acordo co club de orixe do xogador.

A pesar da resolución, o nome do equipo aínda figuraba este sábado na lista de sancionados da FIFA, á espera da actualización oficial.