A denuncia do BNG solicita á institución que recomende á rexedora de Cee que convoque as sesións conforme ao acordado no pleno de organización do 30 de xuño de 2023, e que se respecten os dereitos dos membros da Corporación Municipal.
“"Isto non se cumpre en numerosas ocasións, non se respecta a periodicidade de sesións ordinarias, e o funcionamento ordinario do Concello de Cee é totalmente contrario aos dereitos dos concelleiros e concelleiras, obstruíndo e dificultando as súas funcións de fiscalización e control."
O portavoz nacionalista, Serxio Domínguez, lembrou que o acordo establecía que os plenos ordinarios terían lugar o último venres de cada mes ás 20:00 horas, trasladándose ao venres seguinte en caso de festivo. Segundo Domínguez, esta norma non se está a seguir, o que prexudica a capacidade da oposición para exercer as súas funcións.
Ademais, o voceiro do BNG ceense subliñou que a lexislación local é clara ao indicar que os plenos ordinarios deben celebrarse segundo o acordado no pleno de organización, e que un pleno extraordinario non pode substituír un ordinario. A formación considera que a falta de periodicidade vulnera a participación pública dos concelleiros da oposición, xa que os cambios sen xustificación complican a asistencia e a presentación de mocións e asuntos con antelación suficiente.
