As I Xornadas de convivencia e formación na industria musical, enmarcadas no programa Camiño do emprendemento musical promovido pola Xunta, tiveron lugar en Muxía. A iniciativa, organizada por Wake Up coa colaboración da Consellería de Emprego, Comercio e Emigración e da Consellería de Cultura, Lingua e Xuventude, congregou a profesionais e a xente nova interesada no sector.

O programa, que se desenvolveu ao longo de dous días, incluíu obradoiros, charlas formativas e actividades musicais. Comezou o venres cunha sesión sobre promoción de eventos e programación musical, ademais de actuacións en directo. Hoxe sábado, a xornada continuou cunha andaina polo Camiño dos Faros–Ponte do Porto e sesións sobre psicoloxía e saúde mental na industria electrónica, desenvolvemento de carreira artística e iniciación ao traballo de DJ.

O secretario xeral de Emprego e Relacións Laborais, Pablo Fernández, e a directora xeral de Xuventude, Lara Meneses, destacaron a importancia destas iniciativas para achegar á mocidade galega experiencias reais, fomentar o autoemprego e dinamizar o territorio a través das industrias culturais e creativas.

O programa Camiño do emprendemento musical continuará con próximas citas en Santiago (4 de xuño, produción de festivais), Viveiro (18 de xullo, festivais de pequeno formato) e A Coruña (25 de setembro, introdución ao mercado laboral). A iniciativa concluirá en Vigo o 30 de outubro cun acto de peche.