O conselleiro de Cultura, Lingua e Xuventude, José López Campos, asinou hoxe en Viveiro un convenio de colaboración coa alcaldesa deste municipio da mariña lucense, Carmen Gueimunde, dotado con máis de 200.000€, para levar a cabo obras de conservación e mantemento no Teatro Pastor Díaz. López Campos erixiu esta achega como "mostra do compromiso da Xunta co bo estado das infraestruturas culturais que contribúen á dinamización de todo o territorio".
O titular de Cultura do Goberno galego explicou a importancia desta achega para resolver o "deterioro progresivo polo paso do tempo dun dos referentes culturais, patrimoniais e arquitectónicos" deste concello da mariña lucense. Considerou que esta intervención reflicte a aposta da Xunta pola colaboración institucional, "imprescindible para manter nas mellores condicións estes equipamentos e ofrecer un servizo de calidade".
Nesta liña, López Campos salientou que, con este tipo de actuacións, a Xunta está a garantir "o acceso á cultura de todos os galegos e galegas, con independencia das súa situación xeográfica, económica ou social", na liña dos obxectivos da Lei de cultura inclusiva e accesible de Galicia. Lembrou que Galicia foi pioneira en Europa na elaboración dunha normativa que regula a cultura desde a inclusividade e accesibilidade.
As obras no Teatro Pastor Díaz están dirixidas a "preservar a funcionalidade e integridade arquitectónica do espazo, garantindo as condicións de seguridade, salubridade, habitabilidade e conservación, sen alterar os seus valores formais nin culturais".
As intervencións centrarase en solucionar as filtracións na cuberta e nas fachadas, "anulando as humidades por capilaridade", así como no saneamento dos sistemas de seguridade e na modernización da iluminación do patio de butacas. Para o desenvolvemento da intervención neste 2026 están asignados 38.119 euros para actuacións preliminares e obras urxentes de estanqueidade. Para o 2027, a partida é de 161.881€ para o groso da execución material, incluíndo acondicionamento de fachadas, trasdosados interiores, renovación de iluminación escénica e electricidade, e restauración de lenzos artísticos.
O Teatro Pastor Díaz, cuxa historia se remonta á primeira metade do século XX, acolleu representacións teatrais, proxeccións de cine mudo e concertos, converténdose nun elemento vertebrador da vida cultural e lúdica de Viveiro. O edificio destaca pola súa boa acústica, a integración co tecido urbano histórico e a calidade formal e decorativa dos seus espazos interiores, con pinturas no teito e friso superior que representan a Rosalía de Castro e Nicomedes Pastor Díaz.
