O Concello de San Sadurniño vén de renovar as súas tres Flores de Honra no certame Vilas en Flor, unha distinción que o municipio mantén de maneira ininterrompida desde 2021. A entrega dos recoñecementos tivo lugar esta mañá nun acto celebrado en Salceda de Caselas, no que participaron representantes dos 40 municipios inscritos nesta edición. O alcalde, Secundino García Casal, foi o encargado de recoller o galardón, que refrenda o traballo municipal na conservación e mellora dos espazos verdes, na protección da paisaxe e na promoción dunha xestión ambiental sostible.
Vilas en Flor é unha iniciativa promovida pola Fundación Juana de Vega, a Asociación de Viveristas do Noroeste (ASVINOR) e a Asociación Galega de Empresas de Xardinería (AGAEXAR), co apoio da Xunta de Galicia. O programa busca premiar simbolicamente a aqueles municipios que apostan por ofrecelle máis calidade de vida á súa veciñanza a través dos espazos verdes, o axardinamento, a protección da biodiversidade e a sensibilización ambiental. O certame distingue os concellos participantes cunha cualificación de entre unha e cinco Flores de Honra.
San Sadurniño conseguiu por primeira vez as tres Flores de Honra en 2021 e desde aquela vén renovando anualmente esta cualificación, consolidando a súa presenza entre os municipios galegos máis destacados polo coidado da paisaxe e dos espazos públicos. A continuidade do distintivo reflicte o traballo desenvolvido no mantemento dos xardíns e zonas de lecer, e na posta en valor dos recursos naturais do territorio, principalmente os da trama urbana.
Na visita de avaliación realizada o pasado 20 de outubro, o xurado de Vilas en Flor coñeceu actuacións como as intervencións na zona da Cortiña e nos xardíns municipais, onde se renovaron as instalacións da horta de conservación de froiteiras; se ampliou a área de servizos para autocaravanas; se renovou e incrementou o contido da Fraga Máxica; e se construíu unha nova zona de xogos nos xardíns do pazo. Tamén se creou unha caseta multiusos do comear didáctico, que funcionará como espazo de apiterapia.
Outro aspecto destacado foi a elaboración dun inventario da flora presente nos terreos de titularidade municipal, que identificou 75 especies vexetais e 893 plantas distribuídas en máis de 4,5 hectáreas de espazos públicos. Esta ferramenta facilitará a planificación de futuras actuacións de conservación e mellora ambiental.
