A formación nacionalista critica que o executivo local limita as súas actuacións a "limpezas cosméticas e superficiais" xusto antes de eventos específicos, como a recente andaina á Romaría da Virxe da O. Para o BNG, estas intervencións puntuais demostran que o Concello "ten capacidade de actuar, pero decide non facelo de modo sostido no tempo".
“"A veciñanza de Xuvia, Doso, Pedroso e as persoas usuarias da senda teñen dereito a unha infraestrutura digna sempre, non só cando hai unha andaina programada."
A moción tamén lembra que o BNG leva desde 2020 reclamando unha intervención integral. Ante a falta de resposta, a propia militancia e simpatizantes do partido organizaron xornadas de limpeza voluntaria en 2020 e 2023, onde ademais sinalizaron manualmente puntos críticos como escaleiras podres e árbores caídas para previr accidentes.
Un dos puntos clave da proposta é a necesidade de actuar sobre o leito do río. O BNG insta ao goberno de Narón a que se poña en contacto coas administracións competentes, en particular con Augas de Galicia, para coordinar unha limpeza integral do río Xuvia que retire residuos sólidos e outros obstáculos, buscando tamén o financiamento necesario para a súa conservación.
