Esta feira é un tributo ás fabas, co obxectivo de poñer en valor este produto, manter viva unha tradición do concello e promover a recuperación dun cultivo importante no pasado. Hoxe, a faba representa unha oportunidade para diversificar a economía do agro e levar ás mesas un produto de calidade e de proximidade.
A xornada, que se desenvolverá entre as 10.00 e as 15.00 horas, concentrarase na nave recentemente rehabilitada do Centro de Desenvolvemento Económico e Social (CEDES). Alí atoparanse fabas da máxima calidade de pequenas explotacións da zona e de Lourenzá, ademais de postos da feira mensual, artesanía e doces.
Poderán participar na feira elaboradores de produtos derivados da faba e/ou outro produto da horta, artesáns, comerciantes, asociacións, cooperativas e entidades sen ánimo de lucro que promovan a agricultura local ou produtos tradicionais. O prazo de inscrición remata o 5 de outubro e as solicitudes poden presentarse a través da sede electrónica do Concello de Moeche.
A xornada estará amenizada pola actuación da Banda de Gaitas Alxibeira do Padroado da Cultura de Narón, financiada pola Rede Cultural da Deputación da Coruña. Tamén haberá concurso de debagado de fabas, sorteo de lotes de produtos e a tradicional degustación de fabada a prezos populares, preparada pola AVV de Labacengos.
O programa inclúe a apertura dos postos ás 10.00h, a actuación da banda de gaitas ás 12.15h, o inicio da degustación de fabada ás 12.30h, o concurso de debagado ás 12.45h e o sorteo de lotes ás 13.45h. A feira clausurarase ás 15.00h.
Nesta edición, o Concello conta coa colaboración da Área de Cultura da Deputación da Coruña e da AVV de Labacengos.
